Халықаралық ынтымақтастық
2026 жылғы 25 мамыр мен 6 маусым аралығында С.Ж. Асфендияров атындағы ҚазҰМУ Стоматология мектебінің ортопедиялық стоматология кафедрасына Америка Құрама Штаттарынан шақырылған профессор Али З. Сайед келді.
Али З. Сайед — Кейс Вестерн Резерв университетінің Стоматологиялық медицина мектебіндегі ауыз қуысы және жақ-бет медицинасы мен диагностикалық ғылымдар кафедрасының қауымдастырылған профессоры. Ол BDS, MHA және MS академиялық дәрежелеріне ие, кәсіби еңбек өтілі — 25 жыл.
11 күндік академиялық сапар аясында профессор кафедраның білім беру жұмысына қатысты. Бағдарлама ағылшын тілінде өткізіліп, ауыз қуысы мен жақ-бет аймағын диагностикалау, заманауи екі өлшемді және үш өлшемді бейнелеу әдістері, конустық-сәулелік компьютерлік томография және стоматологияда жасанды интеллектіні қолдану салаларында тәжірибе алмасуға бағытталды.
Сапар студенттердің, резиденттердің және оқытушылардың кәсіби құзыреттерін дамытуға, сондай-ақ С.Ж. Асфендияров атындағы ҚазҰМУ мен Кейс Вестерн Резерв университеті арасындағы халықаралық ынтымақтастықты нығайтуға ықпал етті.
«Ортопедиялық стоматологиядағы заманауи трендтер» халықаралық конференциясы
2026 жылғы 5 маусымда С.Ж. Асфендияров атындағы ҚазҰМУ-да медицина ғылымдарының докторы, профессор, ҚазҰЖҒА академигі, ортопедиялық стоматология кафедрасының меңгерушісі Көбейсін Дүйсенбайұлы Алтынбековтің 70 жылдығына арналған «Ортопедиялық стоматологиядағы заманауи трендтер» халықаралық ғылыми-практикалық конференциясы өтті.
Конференцияға Қазақстан, Ресей, Өзбекстан, Қырғызстан, АҚШ және Түркиядан ғалымдар, оқытушылар, тәжірибелік дәрігерлер, резиденттер мен студенттер қатысты. Конференция жұмысына ҚазҰМУ, Самарқанд мемлекеттік медицина университеті, Ташкент мемлекеттік медицина университеті, Бұхара мемлекеттік медицина институты, Қырғыз мемлекеттік медицина академиясы, Омбы мемлекеттік медицина университеті, Ресей халықтар достығы университеті, Қазан федералдық университеті, Кейс Вестерн Резерв университеті және басқа да білім беру және медициналық ұйымдардың өкілдері қатысты.
Ғылыми бағдарлама ортопедиялық стоматологияның заманауи бағыттарын қамтыды: цифрлық жоспарлау және 3D-модельдеу, стоматологиялық білім беру мен клиникалық тәжірибеде жасанды интеллект пен үлкен тілдік модельдерді қолдану, дентальды имплантация, аддитивті технологиялар, жақ-бет аймағындағы операциялардан кейін пациенттерді ортопедиялық оңалту, самай-төменгі жақ буыны ауруларын диагностикалау және тіс протездерін дайындау кезінде цифрлық хаттамаларды пайдалану.
Кейс Вестерн Резерв университетінің қауымдастырылған профессоры Али З. Сайед стоматологиялық білім беру мен клиникалық тәжірибеде үлкен тілдік модельдер мен генеративті жасанды интеллектіні қолдану туралы баяндама жасады. Шетелдік қатысушылар тіс алынғаннан кейін ұяны сақтау, цифрлық жоспарлау, эстетикалық оңалту, керамикалық винирлерді қолдану, имплантацияның және ортопедиялық емдеудің заманауи әдістері жөнінде баяндамалар ұсынды.
Бағдарламаның жеке бөлімі оқытушылардың, жас ғалымдардың, резиденттер мен студенттердің постерлік баяндамаларына арналды. Қатысушылар академиялық ұтқырлық, жасанды интеллект, хирургиялық имплантация, тістерді биологиялық бағдарланған әдіспен егеу, бруксизм, цифрлық стоматология және заманауи ортопедиялық материалдар бойынша зерттеу нәтижелерін ұсынды.
Конференцияның өткізілуі ғылыми және клиникалық тәжірибе алмасуға, кәсіби байланыстарды кеңейтуге және ҚазҰМУ-дың шетелдік жетекші стоматологиялық мектептермен және медициналық университеттермен халықаралық ынтымақтастығын нығайтуға ықпал етті.
